Estrutura do ril

Todo o ril está cuberto por unha cápsula de tecido conectivo colagenoso denso denominada como cápsula nefrótica, e sobre o seu bordo medial encóntrase unha incisura denominada hilio renal onde podemos apreciar a saída de estruturas vitais como a arteria e vea renais e o uréter.

Se se corta o ril paralelamente ás súas dúas caras, pódese observar que o parénquima (porción celular) está composto por dúas zonas de cor distinta, ás que se chamou medular, ou interna, e cortical, ou externa. Na medula aparecen unhas estriacións organizadas en forma piramidal. Estas pirámides son as denominadas pirámides de Malpighi (ou renais) que presentan un vértice orientado cara aos cálices (papilas).

Zona cortical ou codia: Situada na parte externa e é de cor vermella clara. A cortical, de cor máis amarelenta, presenta na súa parte máis externa pequenos puntitos vermellos que corresponden aos corpúsculos de Malpighi. A substancia cortical cobre a medular e enche tamén os espazos que deixan entre si as pirámides de Malpighi.

Zona medular: Ocupa a parte interna, a substancia medular, de cor vermello escuro, composta por 8 a 18 formacións triangulares (pirámides renais de Malpighi). A súa base está en contacto coa substancia cortical e o seu vértice, que presenta 15 a 20 pequenos orificios, áchase en comunicación cun cáliz renal, que leva os ouriños á pelve renal.

Nun corte lonxitudinal dun ril, pódense recoñecer tres partes:
A codia renal, presenta un aspecto avermellado escuro granulado e rodea completamente á medula renal enviando prolongacións denominadas columnas renais que se enxertan en toda a profundidade medular.

A medula renal, presenta o dobre de espesor que a codia e unhas estruturas de cor avermellada moi clara con forma de pirámides, denominadas pirámides renais, que se separan polas columnas renais.

As papilas renais, distribúense cada unha dentro dun cáliz menor en forma de embude, tomando en conta que cada ril humano posúe 8 a 18 pirámides renais, existindo tamén de 8 a 18 cálices menores, e de 2 a 3 cálices maiores.